Margarita d'Youville

Maria Margarita Dufrost de Lajemmerais viginti annos nata Francisco d'Youville nupsit, qui indigenis Americae aquam vitae vendebat et dotem eius dissipavit; duodetriginta annos nata vidua, sex liberos pepererat, e quibus duo superfuerunt, tabernamque tenuit ut aes alienum solveret. Cum tribus sociis debiles et mendicos in domum suam recepit, unde conditrices in via conviciis « les sœurs grises » appellatae sunt — mulieres griseae, id est ebriae, ad mariti defuncti negotium alludendo. Nomen probrosum retinuerunt et post duodeviginti annos vestem griseam sumpserunt. Anno 1747 nosocomium generale Marianopolitanum, dirutum et aere alieno oppressum, iis commissum est, quod restituerunt; ibi expositos infantes, milites Anglos vulneratos et captivos sine discrimine receperunt. Ioannes Paulus II eam anno 1990 sanctam declaravit.