Marina Omurensis

Marina Omurae nata est, unde nomen Marinae Omurensis quod ei plerique fontes tribuunt; usus autem Gallicus eam Marinam Nagasakiensem appellat, in qua urbe obiit. Anno 1626 tertium ordinem Dominicanum ingressa est ibique privata vota paupertatis, castitatis, oboedientiae nuncupavit, cum religio Christiana in Iaponia proscripta esset. Missionarios quaesitos hospitio excepit: id ei obiectum est. In carcerem coniecta, publice castitatis suae ludibrio exposita est, deinde lento igne die 11 novembris anno 1634 combusta est. Ioannes Paulus II eam anno 1981 Manilae beatam et die 18 octobris anno 1987 inter sedecim martyres Iaponiae sanctam declaravit, inter quos et Laurentius Ruiz numeratur: quos Ecclesia simul die 28 septembris colit, Martyrologium autem Romanum Marinae proprium diem servat, die 11 novembris. Ne cum Magdalena Nagasakiensi confundatur, quae eodem anno 1634 obiit et eodem die sancta declarata est, sed in fovea suspensa.